2026 жылғы 19 қарашада Астанада ғылым және жоғары білім саласындағы III Стратегиялық серіктестер форумы өтті. Оған Мемлекет басшысы Қасым-Жомарт Тоқаев қатысты. Форумға жетекші ғалымдар, отандық және шетелдік университеттердің басшылары, білім беру саласының сарапшылары мен халықаралық ұйымдардың өкілдері жиналды.
Президент өз сөзінде жаппай цифрландыру және жасанды интеллект дәуірінде ғылым мен білімнің әлем өркениетіндегі орны айрықша екенін атап өтті. Мемлекет басшысы ғылыми қауымдастық өкілдері халықаралық шиеленісті бәсеңдетуге елеулі үлес қосып отырғанын айтып, еліміздің стратегиялық мақсаты – Қазақстанды Орталық Азиядағы академиялық хабқа айналдыру екенін жеткізді.
Президент саладағы негізгі көрсеткіштерді келтірді. Бүгінде еліміздегі 132 университетте 800 мыңнан астам студент білім алады. Ғылымды қаржыландыру көлемі 590 миллион долларға жетті. 18 қазақстандық университет QS World University Rankings 2026 рейтингіне енді. Шетелдік студенттер саны 41 мыңға жетті, ал Study in Kazakhstan бастамасы аясында 2029 жылға қарай олардың санын 100 мыңға жеткізу жоспарланып отыр.
Мемлекет басшысы Мұхтар Әуезов атындағы Оңтүстік Қазақстан университетіне ұлттық мәртебе берілгенін жариялады. Сондай-ақ Қазақстан Республикасы Ғылым және жоғары білім министрлігі мен Біріккен Ұлттар Ұйымының университеті Алматыда БҰҰ университетінің өңірлік зерттеу хабын ашу туралы келісім жасасты.
Президент жасанды интеллектті дамыту мәселесіне ерекше назар аударды. Ол отандық KazLLM және AlemLLM тіл модельдерін, Qazaq AI Research University-дің ашылуын және AI-Sana бағдарламасын атап өтті.



Фото: Ақорда